¿Qué ye’l montañismu?

El montañismu podía definise como’l conxuntu d’habilidaes, conocimientos y técniques necesaries p’algamar l’oxetivu d’encumar un monte. Davezu trátase como un deporte más, pero históricamente caltién un componente d’aventura y esploración que fai que tienda hacia una forma de vida más qu’a un puru deporte.
D’esta miente, surden munches actividaes al rodiu’l monte, toes elles distintes, pero al empar iguales, ya que tienen un puntu en común: el terrén de xuegu nes que se practiquen… el monte.

1- Alpinismu

L’alpinismu tien los sos oríxenes nos Alpes, grandes montes y técnicamente difíciles, pasando depués a ser un términu usáu pa xeres montañeres que superen enforma les ascensiones a pie de monte. Los preseos necesarios p’algamar los nuesos oxetivos y el deprendimientu técnicu que lleva, faen qu’esta modalidá tea más averada al entornu de la escalada qu’al propiu montañismu.

Si aplicamos el términu alpinismu a otros llugares del mundiu, pasaremos d’altores de cuatro mil metros a los siete mil del Andinismu y al nomáu “ochomilismu” del Himalaya, onde s‘algamen les mayores fazañes históriques del montañismu.

2- Senderismu

Actividá montañera, que se dedica a percorrer caminos ensin que les rutes presenten escesives dificultaes técniques, loxístiques nin d’orientación. Suelen facese sobre siendes abalizaes previamente, desendolcándose na mayor parte de los casos nun día de marcha.

Hai dos tipos de siendes abalizaes: de gran percorríu, con distancies mayores de 50 km polo xeneral, señalizaes con marques colloraes y blanques; y de percorríu curtiu, con menos distancia y marques marielles y blanques.

La combinación de cenciellos trayectos con intereses culturales, paisaxísticos, históricos y mesmo gastronómicos, ficieron espoxigar esti tipu d’actividá al aire llibre, dotando d’importancia turística a pequeños pueblos y llugares desconocíos.